اسلام آباد – 23 – آڪٽوبر (اي پي پي) آزاد ڄمون ۽ ڪشمير جو 76 هون يوم تاسيس 24 آڪٽوبر تي روايتي جوش ۽ جذبي سان ملهايو ويندو جنهن جي لاءِ ڀرپور تياريون جاري آهن. اهو ڏينهن هر سال 24 آڪٽوبر 1947ع تي آزاد ڄمون ۽ ڪشمير رياست جي قائم ٿيڻ جي ياد ۾ ملهايو وڃي ٿو. ان ڏينهن گڏيل قومن جي سلامتي ڪائونسل جي قراردادن موجب ڀارت جي غيرقانوني طور تي والاريل ڄمون ۽ ڪشمير جي آزادي تائين جدوجهد جاري رکڻ جي عزم کي ورجايو ويندو. ڏينهن جي شروعات رياستي گادي واري شهر مظفرآباد ۾ 21 توپن جي سلامتي سان ٿيندي. مسجدن ۾ پاڪستان جي خوشحالي ۽ والاريلڪشمير جي جلد آزادي جي لاءِ خصوصي دعائون ڪيون وينديون. ان ڏينهن جي مناسبت سان آزاد ڄمون ۽ ڪشمير جي سمورن ضلعي هيڊڪوارٽرز ۾ خصوصي تقريبون، پرچم ڪشائي ۽ دعائيه تقريبون منعقد ڪيون وينديون. آزاد ڄمون ڪشمير ۽ جو صدر، وزيراعظم، آزاد ڄمون ۽ ڪشمير قانونسازي اسيمبلي جا ميمبر ۽ ٻيا ڪشميري اڳواڻ ان موقعي تي مختلف تقريبن کي خطاب ڪندا. ڪشمير جي آزادي جي جدوجهد جي شهيدن ۽ هيروز کي خصوصي خراج عقيدت پيش ڪيو ويندو ۽ انهن جي عظيم قربانين کي ڪڏهن نه وسارڻ جو وچن ڪيو ويندو. هي ڏينهن غازي ملت سردار محمد ابراهيم خان جي قيادت ۾ قائم ٿيندڙ پهرين انقلابي حڪومت جي قيام جي ياد ۾ ملهايو وڃي ٿو. سردار ابراهيم پنهنجي سرينگر رهائشگاهه تي 1947ع ۾ ڪشمير جي پاڪستان سان الحاق جي قرارداد منظور ڪندڙ تاريخي اجلاس جي صدارت ڪئي. آزاد ڄمون ۽ ڪشمير جو علائقو هن سرزمين جي فرزندن جابر ڊوگره حڪمرانن کان آزاد ڪرايو هو. آزاد ڄمون ۽ ڪشمير هڪ خودمختيار رياست آهي جنهن جو پنهنجو وزيراعظم، صدر، هڪ جدا جهنڊو آهي. گذريل 76 سالن ۾ آزاد ڪشمير ۾ زندگي جي اٽڪل هر شعبي ۾ زبردست ترقي ڏسڻ ۾ آئي آهي. پاڪستان جي حڪومت پنهنجي عوام جي زندگين کي بهتر بڻائڻ، بنيادي ڍانچي جي ترقي ۽ هڪ جمهوري سيٽ اپ جي قيام ۾ نمايان ڪردار ادا ڪيو آهي. پاڪستان حڪومت جي سفارتي حمايت سان آزاد ڄمون ۽ ڪشمير حڪومت جو ڪردار ڪشميرين جي آزادي جيجدوجهد خاص طور تي عالمي سطح تي اهم ڪردار ادا ڪري رهيو آهي. عالمي معاهدن موجب ڄمون ۽ ڪشمير جنهن کي پاڪستان جي شهه رڳ قرار ڏنو وڃي ٿو، هڪ تڪراري علائقو آهي ۽ گڏيل قومن جي سلامتي ڪائونسل جي قراردادن موجب ڀارت ڄمون ۽ ڪشمير جي تڪراري حيثيت کي تبديل نه ٿو ڪري سگهي.
