اسلام آباد-24 نومبر (اي پي پي) سڌ سماءَ ، قومي ورثي ۽ ثقافت واري وفاقي وزير عطاءُ الله تارڙ چيو آهي ته وفاقي گادي واري هنڌ اسلام آباد ۾ زندگي معمول موجب آهي، رستا کليل آهن جڏهن ته ڪجهه رستا بند آهن جنهن جي ذميدار تحريڪ انصاف آهي، شهر جو امن بحال رهندو، ڪنهن کي به امن امان خراب ڪرڻ جي اجازت نه ڏني ويندي، پي ٽي آءِ جا ماڻهو رضاڪاراڻي طور گرفتاريون ڏئي رهيا آهن، پي ٽي آءِ باني اين آر او چاهي ٿو، ان کي گهرجي ته هو عدالتن سان رابطو ڪري. وفاقي گادي واري هنڌ جي مختلف علائقن جي دوري جي موقعي تي ڳالهائيندي وفاقي وزير چيو ته وفاقي گادي واري شهر اسلام آباد جا رستا کليل آهن،ماڻهن جي اچ وڃ جاري آهي، پر ڪجهه رستا بند آهن، جنهن جي ذميوار پي ٽي آءِ آهي. هن چيو ته تحريڪ انصاف جا پنهنجا ماڻهو نٿا چاهين ته سندن اڳواڻ ٻاهر اچي. پنجاب سميت مختلف علائقن مان اطلاع آهن ته پي ٽي آءِ جا ماڻهو رضاڪاراڻي بنياد تي گرفتاريون ڏئي رهيا آهن، ڇاڪاڻ ته اهي نٿا چاهين ته ڏڦيڙ پکيڙيون ۽ اسلام آباد ۾ بنا ڪنهن سبب جي ڌرڻو هڻون. هن چيو ته ڪنهن کي به امن خراب ڪرڻ جي اجازت نه ڏني ويندي. ڏڦيڙ پکيڙيندڙن کي گرفتار ڪيو ويندو، هن چيو ته ڏڦيڙ پکيڙڻ پي ٽي آءِ جي تاريخ آهي، هن هميشه سرڪاري ملڪيتن ۽ ماڻهن جي جان ۽ مال کي نقصان پهچايو. 2014ع جي ڌرڻي ۾ هنن پي ٽي وي تي حملو ڪيو، پارليامينٽ جو دروازو ٽوڙيو، قبرون کوٽيون، 9 مئي تي حملا ڪيا، شهيدن جي يادگارن کي مٽايو، دفاعي ٺڪاڻن کي نشانو بڻايو، اڄ به انهي عمل تي قائم آهن. انهن جي گهر آهي ته اسان سان ڊيل ڪريو، اين آر او ڏيو، اسان جي اڳواڻ کي آزاد ڪريو، پر اهو ڪم حڪومتن جو ناهي، اهو ڪم عدالتن جو آهي، اتي پنهنجو ڪيس وڙهن. هن چيو ته حڪومتي قدمن سان ملڪي ملڪي معيشت صحيح رخ طرف گامزن آهي، پاليسي ريٽ ۽ مهانگائي ۾ گهٽتائي اچي رهي آهي، بيلاورس جو صدر پاڪستان اچي رهيو آهي، اڄ بيلاروس جو ڪاروباري وفد پاڪستان پهچي رهيو آهي. هن چيو ته پي ٽي آءِ کي ملڪي ترقي هضم نه ٿي رهي آهي، ان ڳالهه جي بلڪل اجازت ناهي ته ملڪ جي معيشت کي نقصان پهچايو وڃي. وفاقي وزير چيو ته وفاقي گادي واري هنڌ ۾ امن امان برقرار رکڻ لاءِ نفري مقرر ڪئي وئي آهي، قانون هٿ ۾ کڻڻ جي اجازت ڪنهن کي به نه ڏني ويندي، جيڪي به احتجاج لاءِ هتي ايندا اهي گرفتار ٿيندا، جيڪڏهن احتجاج ڪرڻو آهي پنهنجي صوبي ۾ ڪن، هن چيو ته رستا بند ٿيڻ سان واپارين ۽ ڪاروباري ڌرين جو نقصان ٿئي ٿو ان جي ذميدار تحريڪ انصاف آهي، اها واپاري کي نقصان پهچائڻ چاهي ٿي. اها چاهي ٿي ته ملڪي معيشت ڊي ريل ٿي، سرڪاري معاملا سرانجام نه ڏئي سگهجن. هن چيو ته تحريڪ انصاف ٻڌائي ته هي ڪهڙي عوامي مسئلي تي ٻاهر نڪتي آهي؟ عطاءُ الله تارڙ چيو ته بجلي تي اڳ ئي سبسڊي ڏني وئي آهي، وزيراعظم ونٽر پئڪيج جو اعلان ڪري چڪو آهي، ونٽر پيڪيج سان بجلي جا بل سردين ۾ گهٽ ايندا، مهانگائي گهٽ ٿي رهي آهي، عوام کي سهولتون ڏنيون پيون وڃن پر هي زد ۾ آهن ته اسان کي احتجاج ڪرڻو آهي، انهن جو احتجاج ڪنهن شيءَ خلاف ناهي انهن جي صرف اها گهر آهي ته سندن ليڊر کي آزاد ڪريو. هن چيو ته وفاقي گهرو وزير امن امان يقيني بڻائڻ جي حوالي سان صورتحال جو مسلسل جائزو وٺي رهيو آهي ۽ ان ڳالهه کي يقيني بڻايو پيو وڃي ته وفاقي گادي واري هنڌ ۾ سيڪيورٽي جا انتظام سٺا هجن. هن چيو ته راولپنڊي ۽ اسلام آباد ۾ امن بحال رهندو جيڪي ماڻهو ڪاهه ڪرڻ اچي رهيا آهن انهن جي پاڻ ۾ ويڙهه آهي، اهي ڏڦيڙ پکيڙڻ چاهين ٿا، سندن پنهنجي پارٽي ۾ ڏڦيڙ جو شڪار آهي. وفاقي وزير چيو ته اسان پرعزم ۽ پراميد آهيون ته حالتون پرامن رهنديون، هن چيو ته پاڪستان جي معيشت ترقي ڪري رهي آهي، بيلاروس جي صدر کي ڀليڪار چونداسين، هو پاڪستان ۾ سيڙپڪاري ڪرڻ اچي رهيو آهي ان جو گرمجوشي سان آڌرڀاءُ ڪنداسين. هن چيو ته پاڪستان ويجهڙ ۾ ئي ايس سي او ڪانفرنس جو بندوبست ڪيو، دوست ملڪ هتي سيڙپڪاري ڪري رهيا آهن. هن چيو ته پي ٽي آءِ هميشه دوست ملڪن سان لاڳاپا خراب ڪرڻ جي ڪوشش ڪئي آهي ۽ هاڻ اسلام آباد ۾ ڏڦيڙ پکيڙڻ لاءِ اچي رهي آهي. هن چيو ته اهي پنهنجي صوبي ۾ امن امان جي صورتحال کي ڪنٽرول ڪن، ڪرم ايجنسي جي ماڻهن جو ڪنهن کي ڪو خيال ناهي، ڪرم ايجنسي ۾ اڄ به مظاهرا ٿي رهيا آهن، هن چيو ته پي ٽي آءِ جو اسلام آباد ۾ احتجاج جو مقصد ۽ مطالبو ڪهڙو آهي ڪير به نٿو ڄاڻي. هن چيو ته معيشت ترقي ڪندي رهندي، معيشت کي ڊيل ريل ڪرڻ جي ڪوشش ڪندڙن سان سختي سان منهن ڏنو ويندو، ان کان اڳ وفاقي وزير پاڻ گاڏي هلائي اسلام آباد جي مختلف علائقن جو دورو ڪيو، ان موقعي تي هن پوليس جوانن ۽ آفيسرن سان ملاقات ڪئي، ٻارن ۽ ڪٽنبن سان به مليو.
