اسلام آباد-21 نومبر (اي پي پي) گهرو معاملن واري وفاقي وزير محسن نقوي چيو آهي ته ڳالهين ۾ حق ۾ آهيان پر ڌمڪين سان ڳالهه ٻولهه نٿي ٿي سگهي، پي ٽي آءِ باني سان حڪومت جون ڪنهن به قسم جون ڳالهيون نه ٿي رهيون آهن، جيڪڏهن پي ٽي آءِ باني کي ڳالهيون ئي ڪرڻيون آهن ته عدالتن سان ڪري جتان کيس آزادي ملي سگهي ٿي، احتجاج پنهنجي ضلعن ۽ صوبي ۾ ڪن، ڪنهن کي به اسلام آباد تي ڪاهه جي اجازت نٿا ڏئي سگهون، هر اهم موقعي تي پي ٽي آءِ جو احتجاج هوندو آهي، فيصلو عوام ڪري ته اهي ڪهڙا ايجنڊا تي هلي رهيا آهن. هو ڪالهه اسلام آباد هاءِ ڪورٽ ۾ پيشي کانپوءِ ميڊيا سان ڳالهائي رهيو هو. گهرو سيڪريٽري آغا خرم، آءِ جي اسلام آباد سيد علي ناصر رضوي، چيف ڪمشنر اسلام آباد به گهرو وزير سان گڏ عدالت ۾ پيش ٿيا. گهرو وزير محسن نقوي جو چوڻ هو ته 24 نومبر تي بيلاروس جو 65 رڪني وفد اچي رهيو آهي جنهن ۾ 10 وزير به شامل آهن، 25 نومبر تي بيلاروس جوصدر به اچي رهيو آهي جنهن جو ٽن ڏينهن جو دورو آهي، اهڙو ماحول آهي، اسان کي اهڙي طرح ڪنٽينر لڳائڻا پوندا ۽ موبائيل فون سروس به بند ڪرڻي پوندي ڇاڪاڻ ته رياست جي مهمانن جي حفاظت اسان جي پهرين ترجيح هوندي، ان کانپوءِ اسان کي پنهنجي شهر ۽ پنهنجي شهرين جي حفاظت ڪرڻي آهي، ان لاءِ اسان ڪنهن کي جلسي ۽ جلوس جي اجازت نٿا ڏئي سگهون. هن چيو ته احتجاج کي ڪو به نٿو روڪي، اوهان جتي آهيو اتي رهي احتجاج ڪريو، عدالت ۾ به اهو ئي چيو آهي ته اسان ڪنهن کي احتجاج کان ناهي روڪيو پر اسلام آباد ۾ اچي احتجاج ڪرڻ ۽ اهو به ان ڏينهن ۾ احتجاج ڪرڻ جڏهن ڪو اهم ايونٽ ٿي رهيو آهي، عوام فيصلو ڪري ته اهي اهم ڏينهن ۾ احتجاج ڇو ڪندا آهن، انتظاميه پنهنجا انتظام پورا ڪندي. پي ٽي آءِ باني سان ڳالهين بابت سوال تي گهرو وزير چيو ته پي ٽي آءِ باني سان ڪا به ڳالهيون نه ٿي رهيون آهن، ڳالهيون ڌمڪين نه ٿيون ٿين، مان ڳالهين جي حق ۾ آهيان پر اهڙي ڪا به صورتحال نه آهي ته ڌمڪيون ڏين ۽ چون ته ڳالهيون ڪرڻيون آهن. هڪ سوال تي هن چيو ته موبائيل فون سروس جي بندش جو فيصلو رات تائين ڪيو ويندو. هن چيو ته خيبرپختونخوا جي وڏي وزير، چيف سيڪريٽري ۽ آءِ جي سان روزاني ڪنهن نه ڪنهن حوالي سان رابطو رهي ٿو، اڃان خيبرپختونخوا کان ايف سي جي 15 پلاٽون جي درخواست آئي آهي، اهو اسان جو صوبو آهي ان کي نٿا ڇڏي سگهون. هن چيو ته اسلام ۾ رهندڙ افغانين جي حوالي سان لائحه عمل ايندڙ ڪجهه ڏينهن ۾ ترتيب ڏنو ويندو. وڏي انگ ۾ افغانين جو گرفتاريون ٿيون آهن، هر احتجاج ۾ گرفتار ٿيندڙ 100 مان 25 افغاني نڪرن ٿا. پاڪستانين جو احتجاج ته سمجهه ۾ اچي ٿو پر افغاني ڇو احتجاج ڪري رهيا آهن؟ پي ٽي آءِ باني جي ڳالهين بابت ڊيڊ لائن جي باري ۾ هن چيو ته عمران خان سان ڳالهيون ٿي ڪٿي رهيون آهن؟ اڊيالا جيل ۾ عمران خان جي صحافين سان ڳالهه ٻولهه جي باري ۾ هڪ سوال تي محسن نقوي چيو ته علي امين گنڊاپور ۽ بئريسٽر گوهر عمران خان سان ملاقاتون ڪيون آهن، جيڪڏهن ان (پي ٽي آءِ باني) جي خواهش آهي ته سامهون آڻين، جيڪڏهن اهي ڳالهيون ڪرڻ چاهين ٿا ته ٻڌائين، پر اهو نٿو ٿي سگهي ته هو چون ته هو اسلام آباد ايندا ۽ اسان جي ماڻهن تي ڏنڊا وسائيندا، ان لاءِ اسان ڳالهيون ڪريون ته ايئن نه ٿيندو.
