تونسه بئراج/ ڪوٽ ادو – 22 – نومبر (اي پي پي) بلوچستان جي وڏي وزير سرفراز بگٽي چيو آهي ته پنجاب بلوچستان جي ماڻهن جي لاءِ پنهنجي دل سدائين ڪشادي رکي آهي، ان تي پنجاب جي ماڻهن ۽ حڪومت جا ٿورائتا آهيون، ڪينال جو 100 ڪلوميٽر رهجي ويو آهي، اهو شهباز شريف اسپيڊ سان جلد مڪمل ٿي سگهي ٿو. تونسه ۾ ڪڇي ڪينال منصوبي جي بحالي جي افتتاحي تقريب کي خطاب ڪندي بلوچستان جي وڏي وزير سرفراز بگٽي چيو ته 2002ع ۾ ان منصوبي جي منظوري ٿي جڏهن ته اهو منصوبو مرده گهوڙو بڻجي ويو هو، نواز شريف جي اقتدار ۾ اچڻ کانپوءِ ان جي تڪميل ٿي ۽ خوشحالي جو دور ڏٺو، 2022ع ۾ هتي ٻوڏ سبب تباهي آئي ۽ اسان جي علائقن مان ماڻهن لڏپلاڻ ڪرڻ شروع ڪري ڇڏي، هڪ ڀيرو ٻيهر اسان جي گذارش تي ان خواب جي هاڻي تڪميل ٿي آهي، ان تي وفاق ۽ پنجاب حڪومت جا ٿورائتا آهيون، پنجاب بلوچستان جي ماڻهن جي لاءِ پنهنجي دل سدائين ڪشادي رکي آهي ان تي پنجاب جي ماڻهن ۽ حڪومت جا ٿورائتا آهيون. هن چيو ته هن ڪينال جو 100 ڪلوميٽر رهجي ويو آهي، اهو شهباز شريف اسپيڊ سان جلد مڪمل ٿي سگهي ٿو، بلوچستان جي ماڻهن جي اها ئي خواهش آهي. هن چيو ته دهشتگرد معصوم ماڻهن کي شهيد ڪري رهيا آهن، انهن جو ڪو علائقو يا مذهب نه آهي، پاڪستان هڪ گلدستو آهي.
