اسلام آباد۔5نومبر (اے پی پی) وفاقی وزیر برائے اطلاعات، نشریات، قومی ورثہ تے ثقافت عطا اللہ تارڑ آکھیا جو نینگر آپݨٰی محنت، لگن اتے عزم نال پاکستان کوں ترقی یافتہ اتے خوشحال ملک ٻݨیسن، ملک دی معیشت دی مضبوطی کیتے حکومت ݙینھ رات کوشش کریندی پئی اے۔ فلسطین دے 200 طلبہ کوں پاکستانی اداریاں اچ داخلے ݙتے ڳئن۔ منگل کوں نیشنل یوتھ سمٹ نال بطور مزمان خصوصی خطاب کریندیں ہوئیں انہاں آکھیا جو پاکستان دی بنیاد ہک خواب تے رکھی ڳئی، علامہ اقبال دے خواب کوں قائد اعظم تعبیر ݙتی۔ برصغیر دے نینگراں جدوجہد آزادی اچ قائداعظم دے مونڈھے نال مونڈھا ملا تے کامیابی ڳھدی۔ انہاں آکھیا جو پاکستان اچ باصلاحیت نینگراں دی ڳھٹکی کائنی جیڑھے جو ملک دی ترقی اچ اہم کردار ادا کریندے پئن۔ نینگر ہر فورم تے پاکستان دی نمائندگی کریندے پئن۔ انہاں آکھیا جو موسمیاتی تبدیلی بارے ٻہوں ودھ کم کرݨ دی لوڑھ اے۔ چھل اتے طوفان دی شکل اچ موسمیاتی تبدیلیاں دے منفی اثرات پاروں اساݙا ٻہوں ضیان تھیے۔ انہاں امید کیتی جو پاکستانی نینگر موسمیاتی تبدیلی دے اثرات کوں ڳھٹ کرݨ اچ آپݨا کردار ادا کریسن۔ وفاقی وزیر اطلاعات آکھیا جو پاکستان دے نوجوان صنفی مساوات، صحت دی بہتر سہولیات اتے ملک اتے خطے دی عوام دی فلاح تے بہبود کیتے کوشش کریندے پئن۔ انہاں آکھیا جو پاکستانی نینگراں اچ نہ صرف صلاحیت اے بلکہ او دنیا دے مستقبل کوں نویں شکل ݙے سڳدن کیونجو اساں انسانیت دے سانجھے مستقبل آلے پاسے ویندے پئیوں۔ وفاقی وزیر آکھیا جو صنفی مساوات کوں یقینی ٻݨاوݨ کیتے کوشش دی لوڑھ اے۔ انہاں آکھیا جو حکومت ڈیجیٹل فیلڈ اچ کم کرݨ آلے پاکستانی نینگراں دی مدد کیتے باخبر اتے تیار اے۔ انہاں آکھیا جو نیشنل یوتھ کونسل کوں ٻیا فعال اتے فیصلہ سازی اتے پالیسی سازی دے عمل اچ نینگراں کوں کردار ݙیوݨ دی لوڑھ اے۔ وفاقی وزیر عطاء اللہ تارڑ آکھیا جو غزہ تے اسرائیلی حملے دے بعد پاکستان 200 فلسطینی میڈیکل طلبا کوں پاکستانی اداریاں دا داخلہ ݙتے۔ اسرائیل نہتے فلسطینیاں دی نسل کشی کریندا پئے اتے اوندی فوج جنگی جرائم اچ ملوث اے۔ اقوام متحدہ اتے عالمی برادری فلسطینیاں دی نسل کشی کوں رکواݨ کیتے آپݨا کردار ادا کرے۔ پاکستان 1967ء توں پہلے آلی فلسطینی ریاست دی بحالی چاہندے۔ انہاں آکھیا جو غزہ اچ مغربی کنارے دے نینگراں کوں دنیا دے نینگراں وانڳوں ہکو سویں موقع ملݨے چاہیدن۔
