اسلام آباد۔31دسمبر(اے پی پی):سپیکر قومی اسمبلی راجہ پرویز اشرف آکھیے ترقی و خوشحالی پاکستانی قوم دا مقدر اے، پاکستانی قوم موجودہ چیلنجز تے قابو پاوݨ کیتے پرعزم اے۔ انہاں ایں اعتماد دا اظہار کیتے جو نویں سال دا سجھ پاکستانی قوم کیتے ترقی و خوشحالی دا سجھ بݨ تے ابھرسی ۔ انہاں شہید بینظیر بھٹو اتے شہید ذوالفقار علی بھٹو دی ہم آہنگی، مفاہمت تے مکالمے دیاں پالیسیاں کوں اپناوݨ دی لوڑھ تے زرو ݙیندے ہوئیں آکھیے جو شہید بینظیر بھٹو اتے شہید ذوالفقار علی بھٹو دی مفاہمت دی پالیسی کوں اپنا تے موجودہ چیلنجز تے قابو پاتا ونڄ سڳدے تے ملک کوں تعمیر تے ترقی دے رستے ٹوریا ونڄ سڳدے۔ اے ڳالھیں انہاں نواں سال شروع تھیوݨ دے موقع تے مبارخ ݙیندے ہوئیں آکھی اے ، سپیکر ملک توں دہشتگردی ، انتہا پسندی مکاوݨ کیتے پاکستانی مسلح افواج دیاں صلاحیتاں تے اعتماد کریندے ہوئیں آکھیے جو ساݙی بہادر فوج دہشت گردی دے خلاف لڑدی پئی اے ایں ناسور کوں قابو پاوݨ اچ انہاں کوں قومی یکجہتی اتے دعاواں دی لوڑھ اے ۔انہاں اللہ تعالی توں دعا کیتی جو نواں سال پاکستانی قوم کیتے ترقی، امن اتے استحکام دا سال ثابت تھیوے ۔ ڈپٹی سپیکر زاہد اکرم درانی وی نویں سال دی آمد تے قوم کوں مبارخ ݙتی تے امید کیتی اے جو نواں سال قوم کیتے خوشیاں گھن آسی تے ترقی تے خوشحالی دا سال ثابت تھیسی ۔
