اسلام آباد۔4ستمبر (اے پی پی) وزيراعظم شهباز شريف وئيلي دي چې په سختو حالاتو کښې انساني ژوند بچ كولو له خپل ژوند په خطر کښې اچول زړورتيا ده، د خپل ژوند پروا نه ساتلو سره د سېلاب په چپه كښې د ګېر كسانو په بچ كوؤنكي اېكسكوېټر ډرائيور محب ټول قام وياړي۔ د وزيراعظم آفس ميډيا ونګ لخوا د جاري شوي بيان له مخې وزيراعظم شهباز شريف د دې خيالاتو څرګندونه د بلوچستان په قلعه عبد الله سيمه كښې په سېلابي چپه كښې د ګېر شويو كسانو بچ كوؤنكي اېكسكوېټر ډرائيور محب الله سره خبرو كښې وكړه۔ وزيراعظم محب الله ته 25 لكه روپۍ انعام وركړو او دده ماشومانو لپاره يۍ د وېړيا زده كړو او نورو آسانيو اعلان هم وكړو۔ وزيراعظم محب الله ته وزيراعظم هاؤس ته په راتللو هركلے ووے۔ وزيراعظم د ده د بشري ځانونو د بچ كولو جذبه وستائله۔ په ملاقات كښې د اطلاعاتو وفاقي وزير عطاﺀ تارړ ٬ د تجارت وفاقي وزير جام كمال خان ٬ د انفارمېشن ټېكنالوجي وزير مملكت شزه فاطمه خواجه ٬ د وزيراعظم د يوتھ پروګرام چيئرمېن رانا مشهود احمد خان ٬ د وزيراعظم د ماحولياتي بدلون كوآرډينېټر رومینه خورشید عالم او اړوند چاروكي موجود وو۔ وزیراعظم ووئيل زما په شمول ټول قام په تا وياړي۔ انسانيت سره ستا د مينې د جذبې قدر كوم۔ وزیراعظم ووئيل ته د قام اتل يې٬ همت سره دې قيمتي بشري ځانونه بچ كړل۔ په داسې سختو حالاتو كښې خپل ژوند خطر سره اچول او انساني ځانونه بچ كول د زړورتيا او مړانې كار دے۔ وزيراعظم د محب الله د زړورتيا اعتراف كښې ده ته د حكومت لخوا 25 لكه روپۍ انعام وركړو۔ وزيراعظم د محب الله ماشومانو لپاره تر پوهنتون كچې د وېړيا زده كړو او دده كورنۍ له د روغتيا وېړيا آسانيو اعلان هم وكړو۔ په دې موقعه محب الله وزيراعظم سره خبرو كښې ووئيل تاسو سره ملاقات ما لپاره د لويې درناوي خبره ده۔ ده ووئيل د خلكو د ځانونو بچ كولو په وخت ما كله دا سوچ كړے نه وو چې دا خبره په ګرد هېواد كښې دومره خپره شي۔ ده ووئيل د وزيراعظم او د حكومت مننه كوم چې هغه زما د دغې ګام ستائنه وكړه او ماته يۍ خپل قيمتي وخت راكړو۔ ده زياته كړه چې په دې درناوي او ډاډګيرنه زه د وزيراعظم مننه كوم۔
