اسلام آباد۔14مئی(اے پی پی) وفاقی وزیر مذہبی امور سینیٹر محمد طلحہ محمود آکھیے حج 2023 کیتے انتظامات مکمل کرڳھدن ، عازمین حج کوں سہولتاں ݙیوݨ اچ کوئی کسر نہ چھوڑیسوں ، سرکاری سکیم دے تحت ونڄݨ آلے عازمین قربانی دے اضافی پیسے ادا نہ کریسن ۔ پریس کانفرنس توں خطاب اچ وفاقی وزیر مذہبی امور آکھیے وزارت اچ آئے انہاں کوں ھک مہینہ تھئے ، حج 2023 دے حوالے نال کجھ امور اچ دیر تھئی اے مگر ݙینھ رات محنت کرتے سارے انتظامات اتے سہولتاں دی فراہمی کوں یقینی بݨایا ڳئے ۔ انہاں آکھیے گزریل سال حج سوکھا ہئی ، گزریل سال سرکاری کوٹے دے تحت 34 ہزار اتے پرائیوٹ سکیم دے تحت 47 ہزار عازمین فریضہ حج دی سعادت حاصل کیتی ہئی ، ایویں دنیا توں 8 لکھ 50 ہزار لوک حج کیتے آئے ہن۔ اڄوکے سال صورتحال مختلف اے، اڄوکے سال پوری دنیا توں 20 لکھ لوک فریضہ حج دی سعادت حاصل کریسن جݙاں جو 10 لکھ دے نیڑے مقامی لوک وی ہوسن ، ایں کیتے گزریل سال وانڳوں اڄوکے سال حج مشکل ہوسی تاں جو میں یقین ݙوینداں جو انتظامات اتے سہولتاں دے حوالے نال کوئی کسر نہ چھوڑی ویسی ۔ انہاں آکھیے اڄوکے سال پاکستان کوں ھک لکھ 79 ہزار حاجیاں دا کوٹہ ملیے ، 85 ہزار عازمین سرکاری اتے 89 ہزار نجی شعبے دے تحت حج ادا کریسن ۔ انہاں آکھیے حج کیتے انتظامات دے حوالے نال ݙینھ رات محنت کیتی ڳئی اے ، وزارت دا عملہ مسلسل مصروف اے، انہاں دی حوصلہ افزائی ہووݨی چاہیدی اے ، میڈیا کہیں وی کمی دی نشاندہی کرے ایندا ازالہ کیتا ویسی ۔ وفاقی وزیر آکھیے اڄوکے سال حج کیتے خرچہ 11 لکھ 75 ہزار روپے ہن ، اساں کوشش کیتی ا جو اینکوں گھٹ کیتا ونڄے ۔ انہاں آکھیے سرکاری سکیم دے تحت حج کرݨ آلے لوک قربانی کیتے اضافی پیسے ادا نہ کریسن ، ایں کیتے طریقہ کار وضع کرڳھدا ڳئے۔
