لاہور۔30جون(اے پی پی)وفاقی وزیر خزانہ سینیٹر اسحاق ڈار آکھیے جو بین الاقوامی مالیاتی فنڈ (آئی ایم ایف) نال معاہدہ قوم دی کامیابی اے ڄیندے نال پاکستان کوں 3 ارب ڈالر ملسن، وزیراعظم محمد شہباز شریف آئی ایم ایف معاہدہ تے خصوصی توجہ ݙتی اے، وزیراعظم پیرس اچ ڄیڑھیان کوششاں کیتن ایندے تے ٻہوں مشکور ہاں، پچھلے دور حکومت اچ ریکارڈ قرضے ڳھدے ڳن۔ اے ڳالھ انہاں لاہور اچ پریس کانفرنس کریندے آکھی جو آئی ایم ایف معاہدہ کیتے وزیراعظم دی کوششاں قابل تحسین ہین، معاہدہ کیتے وݙا اوکھ تھئے ٻھل اللہ ساکوں کامیاب تے سرخرو کیتے۔ وفاقی وزیر خزانہ آکھیا جو پچھلے 10 ݙینھ اچ معاہدے کیتے بین الاقوامی مالیاتی فنڈ کوں راضی کیتے، پاکستان دے اندر تے ٻاھرو لوک مایوسی کھنݙیندے رہین جو ملک ڈیفالٹ کریسی اتے اے ہک بلین ڈالر بانڈ ادا نہ کر سڳسن ٻھل محمد شہباز شریف دی وزارت عظمیٰ دے دور اچ بانڈ ادا تھئے۔ انہاں آکھیا جو نا اساں بانڈ دی ادائیگی اچ دیر کیتی اے نا پیرس کلب ڳئے ہیں، اساں ہر ادائیگی ویلھے تے کیتی اے جیندے تے ﷲ تعالیٰ دا جتنا شکر کروں ڳھٹ اے۔ انہاں آکھیا جو آئی ایم ایف ٹیم پاکستانی حکام نال سٹاف دی سطح تے 2,250 ملین ڈالر (تقریباً 3 بلین ڈالر یا 111 فیصد آئی ایم ایف کوٹہ) دی رقم اچ 9 مہینے دے سٹینڈ بائی ارینجمنٹ (ایس بی اے) دا معاہدہ کیتے۔ اسحاق ڈار آکھیے جو نواں سٹینڈ بائی ارینجمنٹ معاہدہ حالیہ بیرونی مشکلات توں معیشت کوں مستحکم کرݨ، میکرو اکنامک استحکام برقرار رکھݨ، کثیر جہتی اتے ݙو طرفہ شراکت داراں نال فنانسنگ کیتے فریم ورک ٻݨاوݨ اچ مدد ݙیسی تاں جو پاکستان دی مالی لوڑھ پوری تھیوے، معاہدے نال مالی نظم ضبط بہتر کرݨ، معاشی بحالی اچ مدد ملسی۔
