اسلام آباد 30 جون (اے پي پي﴾ د سائنس او ټېكنالوجې وفاقي وزير چوهدري فواد حسېن وئيلي دي چې په مسلم ليګ ﴿ن﴾ كښې د تره او ورېرې جګړه ده٬ په ګوند كښې د مريم نواز شريف بيانيه چلېږي٬ په ګوند كښې دننه د شهباز شريف څوك هم نه اوري٬ بلاول بهټو او شهباز شريف په ايوان كښې وزيراعظم ته په سلېكټډ وئيلو خوشحال و او مونږ بجټ منظور كړو٬ اپوزيشن ګوندونه خورېږي٬ وزيراعظم سره د ملاقات كوونكو د مسلم ليګ ﴿ن﴾ د 12 غړو لسټ به ډېر زر جاري كړو٬ شپږ مياشتې پس به د پاكستان معاشي حالت بدل شوې وي٬ د عمران خان په مشرې كښې په پاكستان كښې كېدونكي پرمختګ سره به خلق د كال 1960م لسيزه هيره كړي۔ د اتوار په ورځ د سائنس او ټېكنالوجې په وزارت كښې خبري كنفرنس ته د وېنا كولو په مهال چوهدري فواد حسېن ووئيل چې امريكې او افغانستان سره په اړيكو كښې ښه والې راغلې٬ اروپائي اېتلاف سره 25 كاله پس د سائنس او ټېكنالوجې په څانګه كښې رابطې بحال شوې دي٬ د افغانستان په قندهار ښار كښې كامسېټس پوهنتون جوړولې شي٬ په افريقا كښې مو هم دا پوهنتون جوړ كړے دے۔ ده ووئيل چې د معيشت اصل چېلنج د ټېكس وصولي ده۔ د معيشت په اړه ښه خبرونه راځي٬ په خارجه محاذ هم ښه خبرونه راځي٬ دا پاكستان لپاره ښه خو اپوزيشن لپاره بد خبرونه دي۔ ده ووئيل چې شهباز شريف د مخالفې ډلې مشر چوكۍ نه علاوه د ټولو كمېټو نه استعفٰي وركړې ده٬ هغه كله هم د بحران يا د اپوزيشن په وخت كښې ښهه ليډر نه دې پاتې شوے۔ هغه د مشكل دور ليډر نه دے۔ ده ووئيل چې مريم نواز د دې موقعې نه ګټه پورته كولو سره د شهباز شريف په مشرې تورتم جوړ كړے۔ په دې وخت كښې په ګوند كښې د مريم نواز بيانيه چلېږي٬ د شهباز شريف خبره څوك هم نه اوري۔ شهباز شريف د قومي اسمبلۍ په فلور د ميثاق معيشت خبره وكړه او خواجه آصف په دې ډسك هم وغږولو خو بله ورځ چې كله مريم نواز د دې مخالفت وكړو نو خواجه آصف هم بدل شو۔ ده ووئيل چې د مسلم ليګ ﴿ن﴾ منتخب كسانو ته د مريم نواز نيت معلوم دے٬ ځكه دوي ګوند پرېږدي۔ دې جهانديده مېرمنې اول خپل پلار نااهل كړو٬ بيا ئې ګرفتار كړو او اوس ئې د ګوند مشري پغاړه اخيستې۔ د هغې په بيانيه د چلېدونكو طلال چوهدري او د دانيال عزيز معلومه وكړئ چې چرته دي۔ چا چې هم په سياست كښې د مريم نواز خبره منلې٬ هغه تباه شوے۔ ده ووئيل چې د سېنېټ د اوسني چيئرمېن تعلق د بلوچستان عوامي ګوند سره دے او دا زمونږ اتحادي ګوند دے٬ د سېنېټ چيئرمېن د ټاكنې په وخت د عمران خان دريځ و چې بايد چيئرمېن د بلوچستان يا فاټا نه جوړ شي۔ صادق سنجراني زمونږ كانديد و او مونږ چيئرمېن جوړ كړے دے۔
