اسلام آباد-8 ستمبر (اے پی پی) صدرِ مملکت آصف علی زرداری تریمتیں اتے بالڑیاں کوں تعلیم دے ذریعے بااختیار ٻݨاوݨ تے خصوصی توجہ ݙیوݨ دی لوڑھ تے زور ݙیندیں ہوئیں آکھیا جو کوئی وی قوم اوں ویلھے تئیں اپݨی اصل صلاحیت حاصل نئیں کر سڳدی جݙاں تئیں ایں دی ادھی آبادی ترقی دے عمل وچ شریک نہ تھیوے، حکومتِ پاکستان خواندگی دے فروغ کیتے پختہ عزم رکھیندی اے اتے مضبوط عوامی پالیسیاں، معیاری تعلیم وچ سرمایہ کاری، ڈیجیٹلائزیشن وچ جدت اتے کمیونٹی دی شمولیت دے ذریعے ایں مقصد ول ڳامزن اے۔ سنوار کوں ایوان صدر دے پریس ونگ دے مطابق صدرِ مملکت اے ڳالھیں بین الاقوامی یومِ خواندگی دے موقع تے اپݨے سنیھے اچ آکھی۔ انہاں آکھیا جو اڄ بین الاقوامی یومِ خواندگی تے میں سارے پاکستانی توں اپیل کرینداں جو او ایں وݙے مقصد نال اپݨی وابستگی دا اعادہ کرن اتے ہک ایجھے پاکستان دی تشکیل کرن جِتھ خواندگی عام ہووے، تعلیم جامع ہووے اتے علم ہر ہک دی پہنچ اچ ہووے۔ انہاں آکھیا جو خواندگی صرف پڑھݨ اتے لکھݨ دی صلاحیت دا ناں نئیں بلکہ اے انسانی فکری نشوونما دا فروغ، عزتِ نفس دا معاملہ اتے ہک بنیادی انسانی حق وی اے۔ اے افراد کوں اعتماد ݙیندی اے، انہاں کوں معاشرے وچ آواز ݙیندی اے اتے اونہاں مواقع دے در کھول ݙیندی اے جیڑھے ٻئے صورت وچ انہاں دی پہنچ توں ٻاہر رہندن۔ صدرِ آصف علی زرداری آکھیا جو خواندگی ذاتی ترقی اتے سماجی ارتقاءدی بنیاد وی اے جیڑھی شہریاں کوں معیشت، ثقافت اتے جمہوریت وچ پورے طور تے شرکت کرݨ دے قابل ٻݨیندی اے۔ انہاں آکھیا جو خواندگی پاکستان کیتے قومی تعمیر دی بنیاد اے۔ اے غربت اچ کمی، جدت دے فروغ، جمہوریت دے استحکام اتے پائیدار ترقی کیتے اہم اے۔ صدر مملکت آکھیا جو ہک تعلیم یافتہ قوم ای مضبوط قوم ہوندی اے جیڑی دانش، استقامت اتے تخلیقی صلاحیتاں نال آپݨے مسائل دا مقابلہ کر سڳدی اے۔ انہاں آکھیا جو اساکوں تریمتیں اتے ٻالڑیاں کوں تعلیم دے ذریعے بااختیار ٻݨاوݨ تے خصوصی توجہ ݙیوݨی چاہیدی اے، ہک تعلیم یافتہ تریمت نہ صرف اپݨے آپ کوں سنوریندی اے بلکہ اپݨے خاندان اتے معاشرے دی بھلائی دا ذریعہ وی ٻݨیندی اے، او تبدیلی اتے ترقی دی علمبردار ٻݨیندی اے۔ خانداناں، کمیونٹیز، سول سوسائٹی، میڈیا اتے نجی شعبے سمیت اساکوں ساریاں کوں اپݨا کردار ادا کرݨا پوسی۔ اساکوں سکھݨ دی ثقافت کوں فروغ ݙیوݨا پوسی اتے تعلیم کوں پوری قوم دا سانجھا اثاثہ ٻݨاوݨا پوسی۔ انہاں آکھیا جو اڄ بین الاقوامی یومِ خواندگی تے میں سارے پاکستانیاں تے اپیل کرینداں جو او ایں وݙے مقصد نال اپݨی وابستگی دا اعادہ کرن اتے ہک ایجھے پاکستان دی تشکیل کرن جِتھ خواندگی عام ہووے، تعلیم جامع ہووے اتے علم ہر ہک دی پہنچ اچ ہووے۔ صدرِ مملکت آصف علی زرداری ایں ڳالھ تے زور ݙتا جو اساں رل تے ہک معاشرہ ٻݨاوݨے جو انسانی وقار دی پاسداری کرے، تریمتیں کوں بااختیار ٻݨاوے اتے اساݙے شہریاں دی پورے صلاحیت نوں امن، خوشحالی اتے ترقی کیتے استعمال کر ے ۔ انہاں دعا کیتی جو اللہ تعالیٰ اساکوں ایں مشن وچ کامیابی ݙیوے اتے پاکستان کوں ہک روشن، تعلیم یافتہ اتے خوشحال ملک ٻݨاوے۔
