لاہور۔1اپریل(اے پی پی) وفاقی وزیر داخلہ محسن نقوی عید دے موقع تے شہدائے وطن کوں خراجِ عقیدت پیش کریندے ریلوے آفیسرز کالونی والٹن اچ شہید کیپٹن محمد علی قریشی دی رہائش گاہ دا دورہ کیتے۔ ایں موقع تے انہاں شہید دے گھرآلیں نال ملاقات کیتی تے انہاں دے حوصلے دی تعریف کیتی ۔وزیر داخلہ شہید کیپٹن محمد علی قریشی دی والدہ، ذال ، نشوم دھی آیانا اتے ٻئے گھرآلیں نال ملاقات کیتی تے انہاں کوں دلاسہ ݙتے ۔ انہاں شہید کیپٹن دی عظیم قربانی کوں شاندار الفاظ اچ خراجِ تحسین پیش کیتے۔ایں موقع تے شہید کیپٹن دی اماں آپݨے پُتر کوں یاد کریندے رو پئی تے آکھئے “ساݙی سوچ علی توں شروع تھیندی ہئی تے علی تے ہی مکدی ہئی ۔ ایں موقع تے نشوم دھی آیانا والد دی تصویر کوں چُم تے آپݨی محبت ݙکھائی تے انہاں دا میڈل ڳل اچ پاتا ۔ وزیر داخلہ محسن نقوی شہید دے گھرآلیں نال ویلھا گزاریے تے شہید دی جرات و بہادری دی تعریف کریندے انہاں دے اُچے درجات سانڳے دعا منڳی ۔ انہاں آکھئے قوم شہید کیپٹن محمد علی قریشی دی لازوال قربانی کوں ہمیشہ یاد رکھیسی ۔محسن نقوی اے عزم کیتے شہید کیپٹن محمد علی قریشی دی قربانی پاک فوج اتے پوری قوم دے دہشت گردی دے خلاف ناقابلِ شکست عزم دی علامت اے۔ انہاں آکھئے “شہید کیپٹن علی قوم دے ہیرو ہن تے انہاں دے خاندان دا ہر طرح خیال رکھیا ویسی ۔”واضح رہے جو شہید کیپٹن محمد علی قریشی 26 اگست 2024 کوں بلوچستان اچ دہشت گرداں دے خلاف بہادری نال لڑدے ہوئیں شہید تھئے ہن ۔ وزیر داخلہ شہید دی قربانی دی تعریف کریندے آکھئے انہاں بہادری نال مقابلہ کر تے دہشت گرداں دے مذموم عزائم کوں ناکام بݨایا۔
.jpg)
